Србите кои се надеваа дека ова лето со вакцинален картон односно со потврда дека примиле ковид вакцина ќе можат да летуваат на грчките плажи се „попарени“ откако на онлајн состанокот кој денеска го имаа грчкиот министер за туризам Харис Теокарис и српската министерка за трговија, туризам и телекомуникации Татјана Матиќ тие не постигнале никаков договор.

Претходно српските медиуми известија дека двете страни постигнале договор за воспоставување на потврда за вакцинација за доаѓање на туристи од Србија и Грција, но тоа воопшто не е точно, демантираше грчката влада преку весникот Прототема.

Како што се наведува, српската министерка за туризам побарала повеќе детали и информации за предлогот на грчката влада во врска со потврдата за вакцинација. Покрај тоа, Теокарис српската колешка ја известил за големиот интерес што владее кај Србите за посета на Грција оваа сезона.

Србите кои се вакцинирани, од 1 мај ќе можат непречено да влезат во Грција

Исто така во дискусијата која поминала во многу топла атмосфера, министрите за туризам на Грција и Србија размениле и идеи и ставови за отворање на туризмот и се договориле дека наскоро ќе ја продолжат соработката.