Светите браќа овозможија Библијата да биде достапна за сите Словени, а во тој дух на отвореност денес оддаваме почит на нивното дело заедно со сите останати словенски и други народи, кои чувствуваат ист долг кон нивното дело и наследство и ја слават со достоинство и чест. Ова е дел од честитката на премиерот Зоран Заев по повод Денот на сесловенските просветители светите Кирил и Методиј 24 Мај.

„Водени од космополитските начела на светите браќа и нивните ученици, кои спроведоа широка културна активност преку описменување на населението, превод на книги и формирање на книжевни школи, од кои особено е значајна нашата Светиклиментова охридска школа, да покажеме визионерство и преку употребата на алатките кои современата технологија ни ги нуди да се справиме со образовните предизвици на нашето време. Нека ни е честит и вековит 24 Мај, Денот на сесловенските просветители светите браќа Кирил и Методиј!”, напиша Заев. Честитки упатија и другите високи претставници на власта и на политички партии.

По повод празникот, цвеќе пред споменикот на Светите Кирил и Методиј во универзитетскиот кампус положија високи делегации на државниот врв, дел од дипломатскиот кор и други општествено-политички организации во државава – делегација на Собранието, предводена од потпретседателот Горан Мисовски и пратениците Дарко Каевски и Велика Серафимовска-Стојкова, делегација на УКИМ, предводена од ректорот на УКИМ проф. д-р Никола Јанкуловски, како и делегација на Универзитетското студентско собрание на УКИМ.

Македонска црковно-државна делегација вчера се поклони и на гробот на Свети Кирил во Рим по повод големиот празник 24 Мај. Со молебенот на гробот во базиликата „Св. Климент” чиноначалствуваше митрополитот Европски г. Пимен.

Утре, претседателите на Македонија и на Бугарија, Стево Пендаровски и Румен Радев, заедно ќе отпатуваат во Рим, а задутре заеднички ќе оддадат почит на делото на светите браќа Кирил и Методиј во Рим, со положување цвеќе во базиликата Санта Марија Маџоре, каде што во 9. Век, папата Адријан Втори ги благословил азбуката и книгите напишани од светите браќа.

И амбасадите на Северна Македонија и на Бугарија во Белград, Прага, Варшава и Киев, со заеднички настани ќе го чествуваат 24 Мај – Денот на Св. Кирил и Методиј, соопшти Министерството за надворешни работи.