Скопјани и утрово дишат загаден воздух
Скопје утрово е единаесетти најзагаден град во светот со индекс од 161, покажуваат податоците на веб-страницата „Ај-Кју Ер“.
Градоначалничката Данела Арсовска вчера донесе решение за запирање на одлуката за преземање итни мерки за заштита на квалитетот на воздухот во Скопје, која градскиот Совет ја донесе на седницата одржана на 27 ноември. Според образложението на Арсовска со одлуката е извршена повреда на член 50, став 1, точка 6 од Законот за локална самоуправа и на членовите 114 и 115 од Деловникот на Советот на Град Скопје.
Станува збор за мерки, од кои шест се за итно постапување, што советниците од Зелен хуман град ги предложија уште во јануари годинава, кога не поминаа на Совет, за кон крајот на ноември конечно да добијат зелено светло од советниците, по подолга дискусија и расправа со претставниците на Град Скопје.
Скопје се „гуши“, а Арсовска ги запре мерките против загадувањето што ги усвои Советот
Во услови на загаден воздух, се препорачува малите деца, бремените жени, хроничните болни и повозрасните луѓе да не излегуваат на отворено, граѓаните да не ги користат своите автомобили без поголема потреба и да го користат јавниот превоз. Се повикуваат сопствениците и корисниците на камионите да не ги користат ако немаат регулирано испуштање на отпадните гасови, а граѓаните при затоплување на своите домови, да не користат недефинирани горива и отпадни материи од различни технолошки процеси.
На листата на „Ај-Kју Ер“, прв најзагаден град е Лахор, потоа Делхи и на трето место е Дака.
Шукова: Општините немаат краткорочни планови за мерки против загадувањето на воздухот