Откако пред две недели се укинаа сертификатите за отворениот дел на угостителските објекти, со првите пролетни температури се зголемува интересот на посетителите за угостителски објекти. Она што е уште поважно, како што велат угостителите, е што веќе „на големо“ се закажуваат свадби, а се резервираат и термините за матурските прослави. Но, негативната страна е што нема кадар за работа во рестораните и во кафулињата, па угостителите се исправија пред нов предизвик – како да работат.

– Тврдам дека секој втор угостителски објект бара работници. Еден дел од нив за време на пандемијата се преквалификуваа и најдоа друга работа, но најголем дел од готвачите и келнерите заминуваат да работат на море, особено во Хрватска и во Црна Гора. Тие не размислуваат долгорочно, едноставно сега имаат можност да работат на море и да бидат поплатени и ја напуштат овдешната работа за сезонска работа надвор од државата – вели Здравко Јосифовски, претседател на Независната угостителска комора.

Огласи за работа во Хрватска и во Црна Гора има и на нашите сајтови за вработување, и тоа пуштени директно од тамошните хотели и ресторани. На пример, се бараат собарки, хигиеничари, готвачи, помошник готвачи, келнери за позната хотелска групација „Будванска ривиера“. Кадар се бара и за работа во ресторани, па црногорскиот ресторан „Хедонист“ нагласил дека нуди и сместување и исклучителна плата.

„Слободен печат“ стапи во контакт со еден скопјанец, кој веќе е заминат на работа во Хрватска, во Дубровник.

– Почнав со работа од 1 април, а договорот ми е до 1 ноември. Овде имам сместување и еден оброк. Платите за шанкери и келнери се меѓу 1.000 и 1.500 евра. Искусни готвачи може да заработат и по 2.000 и 3.000 евра месечна плата. Ова не е работа „на диво“. Имаме потпишан договор, привремена лична карта и сме осигурени – објаснува нашиот соговорник.

Јосифовски вели дека кај нас биле потценети рестораните, па затоа имало и пониски примања за персоналот.

– Кај нас, во последниве децении се создаде една „навика“ и средношколци, и тоа со такси, редовно да си доаѓаат на ручеци во ресторан. Ова се овозможи со ниски цени, а притоа почна да се губи и на квалитет што би требало да биде достоен за ресторани. Мора да имаме повисоки цени за ресторанските услуги, тоа да не биде сведено на народна кујна, па така и персоналот ќе биде повеќе платен – вели Јосифовски.

Тој објаснува дека во недостиг на кадри, сосема го сменил начинот на работа на неговиот ресторан, па тој сега функционира по принципот на самопослужување, а се нудат менија за појадок и за ручек.

– Успеав да задржам добри готвачи, но така што им понудив еден вид партнерство во работата. Така, сега тие добиваат процент од заработката, а тоа ги мотивира подобро да работат, да останат тука и да создадат услови да имаа заработка како да се во некоја друга земја од регионот – вели Јосифовски.

Според него, во државава мора да се случи еден вид реформа на угостителството според новонастанатите услови.