Русија денес ги тестирала своите системи за јавно предупредување за итни случаи низ целата земја, пуштајќи сирени и прекинувајќи неколку телевизиски и радио преноси за да го предупреди населението да остане смирено, пренесува Ројтерс.

Тестот, првпат спроведен во 2020 година, е дел од новата иницијатива која бара од властите да спроведуваат тестови двапати годишно, почнувајќи од 1 септември.

Сепак, тоа доаѓа во време на војната во Украина што ја предизвика најдлабоката криза во односите на Русија со Западот од Кубанската ракетна криза во 1962 година.

Околу 10:40 часот по московско време, сирените се слушнале низ некои делови на Русија со строги најави кои барале „внимание од сите!“.

„Се проверува подготвеноста на системите за предупредување, ве молиме останете смирени. Кога ќе го слушнете звукот на сирената, треба да останете смирени и да не паничите, да го вклучите телевизорот – кој било јавно достапен канал или радио – и да ја слушате информативната порака. Системот за предупредување е дизајниран да навремено пренесува сигнал до населението во случај на закана или вонредна состојба“, рекоа говорниците со строг машки руски глас.

САД, исто така, во средата спроведоа тест од големи размери на нивните системи за јавно предупредување, преку американските мобилни телефони и ТВ и радио станици. Целта на американскиот тест е да се осигура дека системите „продолжуваат да бидат ефективни во предупредувањето на јавноста за итни случаи, особено на национално ниво“, се вели во соопштението на Федералната агенција за управување со вонредни состојби или ФЕМА.

Многу други земји, исто така, спроведуваат тестови на системот за предупредување за кризи и катастрофи во последниве години.

Рускиот тест се одржува на 91-годишнината од создавањето на рускиот систем за цивилна одбрана и ги следи националните едукативни вежби во август за практикување акции и процедури во итни ситуации, објавија руските медиуми.

Целта на руските тестови е да се проценат системите за предупредување, подготвеноста на персоналот одговорен за нивно лансирање и да се подигне јавната свест, соопшти Министерството за вонредни состојби.