По повод 98-годишнината од раѓањето на еден од основоположниците на македонската современа поезија, Ацо Шопов (Штип, 20 декември 1923 – 20 април 1982, Скопје), престижното италијанско списание за литература „Нуови аргоменти“ во рубриката „Поетска работилница“ објави избор на песни од Шопов.

Изборот, во препев на италијанската поетеса Миа Леконт и македонската италијанистка Анастасија Ѓурчинова, ги содржи песните „Грозомор“, „Има долу една крв“, „Песна“, „Обична улица“, „Молитва за еден обичен, но уште непронајден збор“, „Шеста молитва на моето тело“, „Деветта молитва на моето тело“ и поемата „Долго доаѓање на огнот“.

Списанието „Нуови аргоменти“ е основано во 1953 година од страна на Алберто Моравија. Во 1956 година му се приклучува Пјер Паоло Пазолини, кој ќе раководи со списанието од 1966 до 1980 година. Во тој период особено доаѓа до израз соработката на младата италијанска писателка Дача Мараини, која станува член на раководното тело на редакцијата во 1990 година, а денес е одговорен директор на „Нуови аргоменти“.

(Текстот е објавен во „Културен печат“ број 111, во печатеното издание на весникот „Слободен печат“ на 25-26 декември 2021)