Ова колаче ми е синоним за слава, за одење на гости, за интересен изглед и одличен вкус. Речиси секогаш ги имаше на роденден кај една моја другарка и беа вистинска радост и задоволство за нас децата.

Иако името им асоцира на Русија, рецептот воопшто не е руски, напротив- овие колачи ги прават балканските слаткари, а името е симболично затоа што секое колаче извалкано во кокос и полеано со чоколадо изгледа автентично како руска шубара.

Потребни состојки:

За бисквитно тесто:

• 4 јајца
• 200 гр шеќер
• 100 мл масло
• 100 мл топла вода
• 250 гр брашно
• 1 прашок за печиво
• 1 лажица какао

За крем:

• 1 пудинг со вкус на ванила/јагода по избор
• 350 мл млеко
• 100 гр шеќер
• 1 ванилин шеќер
• 200 гр путер
• 100 гр кокосово брашно

За глазура:

• 100 гр чоколадо за готвење
• 2 лажици масло

Подготовка:

Одвојте ги жолчките од белките, и белките изматете ги со мискер да станат како снег.

Настрана, матете ги жолчките со шеќер додека не станат пенасти и светли. Додајте масло и вода и добро промешајте.

Брашното помешајте го со прашокот за печиво, додајте ја смесата од жолчки со шеќер и мешајте додека да се соедини. Додајте го снегот од белки и добро промешајте.

Вака подготвената смеса поделете ја на два дела, а во едниот дел дојдате го какаото.

Испечете две теста посебно, во големи плехови, околу 10-20 минути на 180 степени. Додека тестото е уште топло, со малечка округла чаша вадете кругови.

Кремот направете го според упатството за пудингот, заедно со шеќерот, ванилиниот шеќер и путерот. Потоа, секое тркалце тесто премачкајте го обилно со пудинг, поклопете го со второто тркалце тесто со какао и премачкајте го цело колаче со кремот пудинг и извалкајте го од страните со кокосово брашно.

Наредете ги руските капи во чинија и кога ќе се оладат, одозгора премачкајте ги врвовите со глазурата од стопена чоколада со масло.

Уживајте!