Тестенините спаѓаат во омилен вид на храна за повеќето луѓе. Со месо, без месо, со зеленчук, сирење, разни сосови и преливи, но секогаш се добредојдени на трпезата. Воедно, брзо се подготвуваат, а изборот на можности со кои состојки ќе ги направите е неограничен.

Ви претставуваме еден од интересните начини за подготовка на тестенини. Овој рецепт ни доаѓа од Грција, а состојките најчесто ги имате дома. Макарони на грчки начин.

Состојки:

– 300 грама макарони
– 200 грама фета сирење
– 100 грама зелени маслинки
– 200 милилитри бело вино
– 200 милилитри супа
– 2 главици кромид
– 3 млади кромидчиња
– 4 домати
– 2 лажици масло за јадење
– сол и бибер

Подготовка:

Сварете ги макароните. Во меѓувреме исчистете го кромидот и исечкајте го на коцки. Младиот кромид исечете го на тркалца. Доматите попарете ги со топла вода, за да може полесно да ги излупите. Исечкајте ги и нив. Загрејте го маслото и додадете го кромидот. Кога ќе се запржи, додадете го младиот кромид, супата, виното и оставете на кратко да се динста. Потоа додадете ги макароните и доматите и зачинете по желба. Додадете го и фета сирењето, и сѐ заедно да се пропржи.

На крајот ставете ги и маслинките исечени на парчиња. Послужете додека јадењето е топло. Вкусното јадење може да го украсите со ливчиња босилек.