Управата на Манчестер јунајтед во консултација со привремениот менаџер Ралф Рангник, го избраа тренерот кој од идната сезона ќе седи на клупата на „црвените ѓаволи“. Станува збор за Рубен Аморим, тренерот на Спортинг Лисабон, пишуваат португалските медиуми.

Аморим е најзаслужен за препородот на Спортинг Лисабон кој минатата сезона ја освои шампионската титула во португалскиот шампионат, а оваа сезона по пауза од речиси две децении обезбеди пласман во осминафиналето од Лигата на шампионите.

Аморим во март 2020 година седна на клупата на Спортинг кој за него плати 10 милиони евра отштета на Брага, која претходно ја водеше само 13 натпревари. Токму овие натпревари беа единствено прволигашко искуство за Аморим, но во тој период успеа да ги победи и Бенфика и Порто, што беше сигнал за Спортинг да го донесе на клупата.

Рангник за ангажманот на Аморим разговарал со Португалците во Јунајтед, Кристијано Роналдо и Бруно Фернандеш, од кои добил пофални зборови, пренесуваат португалските медиуми.

Ралф Рангник ќе седи на клупата на Јунајтед до крајот на сезоната, по што ќе ја презеде улогата на спортски директор.