Работнички во второто коло од Првата македонска кошаркарска лига во салата „Боро Чурлевски“ во Битола славеше против Пелистер на гостински терен (92:89) на дебито на Дарко Радуловиќ како предводник на „зелено-белите“.

Во првата четвртина Пелистер беше тимот кој го контролираше резултатот, најголемата позитива достигнуваше двапати до „плус седум“ (25:18, 28:21). И вторите 10 минути играчите на Радуловиќ ги почнаа добро, но сега нивната предност постепено се намалуваше. Работнички не само што ја доби четвртината 30:18, туку и замина со водство од 51:46 на паузата.

Многу брзо Работнички се стекна и со двоцифрена позитива. По три и пол минути игра во третиот период, гостите водеа со 60:50, но со серија (9:2), Пелистер се врати на 59:62. Но, ништо повеќе од тоа не направија домашните кошаркари. Постојано го „бркаа“ водството на екипата со „подлабок ростер“. По три одиграни четвртини, Работнички имаше сосема солидни 76:64.

Таква беше „сликата на теренот“ и во последниот период. Во неколку наврати биточани се доближија на негатива од седум поени (75:82), потоа на 77:84, како што беше резултатот во 35 минута. Нешто потоа, беа и на 82:89, кога останаа да се доиграат 02:43 минути. Поентирањато на Стојановски, за резултат 84:89 донесе неизвесност во последните две минути од дербито. Маслинко положи за уште пониски 86:90 на влезот на последната минута од играта.

Тројката на Бернард, го доближи Пелистер на само поен негатива (89:90). Домашните кошаркари не успеаја да ја освојат топката со која ќе имаа напад за победа. Еден „отпадок“ собра Де Коузи, кој доби две слободни фрлања кој ги реализираше за 92:89. А обидот на Бернард, не заврши каде што посакуваа „пелистерци“, па на крајот се радуваше Работнички.

Прв стрелец во победничките редови беше Хрватот Рикиќ со 18 поени (седум скокови), а на спротивната страна Американецот Бернард реализираше 27 поени (10 скокови, седум асистенции). Охрид го надигра составот на ФМП Академија со 82:66, а ТФТ со 77:66 беше подобар од Чаир 2030.