РЕК „Битола“ активно се подготвува за новата грејна сезона, и за стабилно производство на електрична енергија, истакна денеска на прес-конференција директорот на Комбинатот Пеце Матевски.

– Моментно нашето производство е над 102 проценти, а депонијата ја одржуваме со над 300 илјади тони јаглен. Веќе се изведуваат ремонтни активности во РЕК „Битола“. Ремонтот на Блок 1 ќе трае 45 дена, потоа следува ремонтот на Блок 2 и започна една од најголемите операции во Рудници, каде што ќе има трансформација на јагленовиот систем. Ќе има поголем ископ на јаглен и ќе обезбедиме стабилно производство за новата грејна сезона-рече на денешната прес-конференција директорот Пеце Матевски.

Тој додаде дека јагленот што го копаат е од подинските јагленови серии во Суводол и од рудникот Брод Гнеотино.

– Се соочуваме со сериозни проблеми, но со тимот и работниците успеваме да имаме стабилно производство, вели директорот Матевски.

Инаку и најголемиот електро енергетски комбинат во државата РЕК „Битола“ се соочува со недостиг на кадар.

– Во РЕК „Битола“ порано работеа 2700 работници, моментно Комбинатот работи со 2080 постојани вработени и околу 400 работници ангажирани со агенциски привремени вработувања. Имаме недостиг на стручна работна сила од недостигот на стручни училишта во Битола. Се јавува дефицит и со инженерскиот кадар, бидејќи во приватниот сектор им се нудат повисоки плати, рече директорот Пеце Матевски на денешната прес-конференција во РЕК „Битола“.

Од септември РЕК „Битола“ ќе работи со полн капацитет кога ќе бидат ставени во функција трите блока.