За наградите на 26. МТФ „Денови на комедија“ во Куманово одлучуваше жирито во состав Магдалена Ризова Черних, претседателка, и членовите Драгана Гунин, Кети Пауновска Стевковска, Петар Андоновски и Стефан Јакимовски.

Според жирито, претставата „Кафез кај Кокони“ на Драмски театар Скопје доби три награди: Најдобар актер за Александар Степанулески; Најдобра споредна улога за Бранко Атанасов; и Најдобра костимографија за Раде Василев и Елена Вангеловска.

На свеченото доделување актерите и добитниците на наградите од ансамблот на Драмски искажаа благодарност до жирито и посетителите на фестивалот и упатија покана до публиката да ја гледа претставата веќе на 28 октомври и во останатите термини на редовниот репертоар на Драмски театар Скопје.

Претставата „Кафез кај Кокони“ на режисерот Димче Николовски ја имаше својата премиера во мај годинава и освен на матичната сцена претставата се играше и во рамки на фестивалот „5ре“ во Велес и „Скопско лето“.

Улогите во претставата ги играатактерите: Жорж – Филип Трајковиќ, Албен – Александар Степанулески, Жакоб – Стефан Вујисиќ, Табаро – Предраг Павловски, Мерцедес – Димитрија Доксевски, Зорба – Маја Вељковиќ Пановска, Лоран – Дамјан Цветановски, Камиј – Соња Стамболџиоска, Едуар – Златко Митрески, Мјуриел – Нела Павловска, Симон – Емилија Мицевска и Саломе – Бранко Атанасов, известија од Драмски театар Скопје.