Две лица од Велес, вчера се обиделе со лажна банкнота од 1.000 денари да купат производи на пазарот во Велес. Продавачот го забележал тоа и пријавил во полиција, но тие побегнале од местото.

По преземени мерки, тие биле пронајдени и уапсени. Подоцна, со судска наредба, бил извршен претрес во нивните домови, при што во домот на Д.Р. биле пронајдени и одземени две фалсификувани банкноти од по 1.000 денари, скенер, принтер и компјутер на кој ги изработувале, додека во домот на В.М. биле пронајдени и одземени две фалсификувани банкноти од по 100 денари и една фалсификувана банкнота од 500 денари, соопштија од МВР.

Во службен разговор во полициска станица тие го признале делото. По целосно документирање на случајот против нив ќе биде поднесена соодветна пријава.