Поранешната републиканка Лиз Чејни изјави за Си-Ен-Ен дека постои „Путиново крило“ во Републиканската партија, по неодамнешните изјави на Доналд Трамп за НАТО и Русија и молкот на Трамп за смртта на Алексеј Навални.

„Мораме сериозно да разбереме до кој степен крилото на Путин во Републиканската партија сега е силно. Верувам дека најважната цел во овој изборен циклус е да се осигура дека Путиновото крило на Републиканската партија нема да го преземе западното крило на Белата куќа“, рече Чејни.

Претседателот Џо Бајден го обвини Владимир Путин за смртта на Навални.

„Нема дилема. Путин е одговорен за смртта на Навални. Путин е одговорен. Она што му се случи на Навални е уште еден доказ за бруталноста на Путин. Никој не треба да се залажува со тоа“, рече Бајден.

Во меѓувреме, Трамп не даде лична изјава за смртта на Навални, што предизвикува загриженост во некои републикански кругови за врските на Трамп со Путин.

„Кога ќе размислите за изјавите на Доналд Трамп, кој, на пример, ветува одмазда по доаѓањето на власт, токму тоа му го направи Владимир Путин на Навални бидејќи така изгледа одмаздата во земја каде што претседателот не го почитува владеењето на закон. Тој во основа јасно стави до знаење дека под администрацијата на Трамп, САД веројатно нема да ги одржат своите обврски кон НАТО“, рече Чејни.

Таа ги нарече коментарите на Трамп „опасни“ и рече дека тие покажуваат „целосен недостиг на разбирање за улогата на Америка во светот“.

Минатата недела Трамп постојано повторуваше дека нема да го брани НАТО од руски напад доколку земјите-членки не платат доволно и рече дека „ќе ја охрабри Русија да прави што сака“.

Лиз Чејни е поранешна републиканска членка на Претставничкиот дом и ќерка на Дик Чејни, поранешниот американски потпретседател за време на мандатот на Џорџ Буш помладиот.