Шефот на американската дипломатија Мајк Помпео ги предупреди ирачките официјални лица дека САД ќе ги „штити и брани“ Американците, по нападот на амбасадата на САД во Багдад, пренесе „Б92“.

Помпео, во телефонски разговор со ирачкиот премиер во заминување Абдел Адбул-Махди и претседателот Бахрам Салих, рекол дека американските власти се одговорни за безбедноста на своите вработени како и за американските инфраструктури, се наведува во соопштението од Стејт департментот.

Помпео „јасно предупредил дека САД ќе ги штити у брани своите државјани кои се во Ирак“.

Неколку илјади Ирачани, припадници на проиранските паравоени сили, денес се собраа пред американската амбасада во Багдад и некои од нив успеаја да влезат во објектот, незадоволни поради американските воздушни напади во Ирак.

Претседателот на САД, Доналд Трамп, оцени дека таа акција ја „режирале“ властите во Иран и побара од ирачките власти да ја заштитат амбасадата.