Во Кинотеката во Скопје, од 6 до 10 декември, се одржува Недела на полскиот филм со прикажување на филмови на режисерот Јержи Сколимовски. Полскиот режисер Јержи Сколимовски има кариера што трае повеќе од 60 години, а чии филмови од шеесеттите години на минатиот век се сметаат за најава на новите естетски тенденции во полската кинематографија.

– Полскиот режисер Јержи Сколимовски е легенда на полското и на европското кино. Токму во тоа ќе може да се уверат филмофилите, гледајќи ги неговите филмови во првата половина на месецов. Она што е за одбележување е проекцијата на, можеби, најценетиот филм на Сколимовски – „Рацете горе“, за товарот на сталинистичкото минато на Полска, забранет за прикажување во земјата цели 18 години – посочија од Кинотеката.

Во текот на петте вечери со полски филмови на програмата се „Ио“ (2022), „Белези на идентификација“ (1965), „Бариера“ (1966), „Лесна победа“ (1965) и „Рацете горе“ (1981), а сите проекции почнуваат во 20 часот.