Кога среде епидемија, претставник на партија ќе ви каже дека имаат подготвено два тима стручњаци, а друга партија дека подготвува илјадници доброволци што би им помагале на заболените, разбирате дека нешто не е во ред. Би било навистина смешно, но и застрашувачко за нивните граѓани, кога претставник на демократската партија на Америка или на лабуристите на Британија би рекле дека имаат подготвено свои тимови стручњаци за борба против коронавирусот или доброволци за првите борбени линии. Јавното здравје, имено, е грижа на државата. Партиите учествуваат во креирањето на здравствената политика преку парламентот и Владата, но не и преку директна акција што би можела да предизвика разногласие кога единството е најпотребно. Всушност, во време на епидемија какво што е ова, ќе видиме колку сериозно работеле партиите на полето на подобрување на состојбите во здравството.

Сега кога епидемијата е тука, на тест е нешто друго: способноста на партиите да се обединат во борбата за здравјето на граѓаните. Да, потребно е да се знае вистината за капацитетите на здравствениот систем кој, низ години, го градат токму партиите, но од дебатата треба да се елиминира најнепосредниот извор на политизација на темата здравство.

Итно треба да се откажат изборите што би требало да се одржат во рок од неколку недели. Зашто, политичкиот инстинкт е секогаш спремен неволјата на другиот да ја стави во служба на партискиот и личниот интерес да се дојде или да се остане на власт. Ако продолжи политизацијата, коронавирусот би можел да добие и партиско обележје. Затоа, да повторам, изборите треба веднаш да се одложат до целосно оздравување на општеството, а силите на сите партии да се впрегнат во заедничкиот напор да се спасиме од чумата. Не помагаат моралните лекции од водствата на партиите дека во време на епидемија не треба политички да се злоупотребува ситуацијата. Така е само во идеалниот свет, додека во реалниот свет на политиката таа се злоупотребува.

Сега не е време за анализи на политичкиот систем на државата. Дека подобро ќе беше ако лидерската средба се одржеше кај претседателот на републиката, институција која треба да прерасне во симбол на единство на државата. Дека уште подобро ќе беше ако најистакнатите претставници на лекарската професија беа наредени зад претседателот со што ќе се намалеше политизацијата на борбата со опасниот вирус. Оти, како што веќе забележуваме, пред избори, целата дебата лесно преминува во партиско наддавање дека „сè е сторено“ или дека „ништо не е сторено“. Кога така се води дискусија, нема една објективна процена на ситуацијата, за она што не интересира како граѓани. Зашто, познат е фактот дека, како и другите балкански земји, имаме здравствен систем кој тешко може да се справи со епидемија од големи пропорции, па затоа е опасно, среде епидемија, прашањето да се политизира.

Треба сите – партии, здруженија, поединци – да застанат зад владата, со цел побезболно да ја прегрмиме неволјата во која се наоѓаме заедно со целиот свет, а потоа да видиме кои се лекциите што сме ги научиле за подобро да ги пречекаме идните кризи.