Еден ден откако беше објавено дека деца од осум години „се регрутираат за вооружени одбранбени патроли“, претседателот на Мексико изјави дека наркокартелите исто така врбуваат мали деца за своите активности.

Во Мексико во тек е расправа околу употребата на деца во вооружени судири, а групите за заштита на човекови права укажуваат дека таквата пракса не само што ја загрозува безбедноста на децата, туку и нивното ментално здравје.

Мексиканскиот претседател Андрес Мануел Лопез Обрадор рече дека со оглед на тоа што социјалните програми им даваат на младите повеќе можности да учат или да работат, наркокартелите имаат проблеми со наоѓање луѓе, па затоа почнуваат „да регрутираат деца“.

– Бандите имаат проблем да најдат„ војници“, така што регрутираат деца и млади кои ги вооружуваат, рече Лопез Обрадор.

Прашањето беше покренато кога група граѓани од јужно Мексико јавно прикажа деветнаесет вооружени и маскирани деца, кои биле регрутирани како „полиција“ која ја чува таа заедница од наркобанди.