Албанската телевизија Топ Чанел денеска преку неколку видеозаписи ги отслика последиците што ги остави големиот земјотрес во Драч и Голем, места многу познати по убавото крајбрежје.

Во едната од снимките се гледа неколкукатна зграда во секторот „Илирија“ на плажата во Драч, која е оценета како непогодна за живеење, поради штетите од земјотресот кој се случи на 21 септември, а беше со магнитуда од 5.8 степени според Рихтер.

Зградата е градба од последната декада и е опкружена со блок ленти, за да се избегне влезот во неа, како и од можните штети поради постојаното паѓање на фасадата.

Целата зграда претрпе значителни штети внатре и надвор, а жителите се сместени кај блиските роднините и куќите за одмор на министерствата кои се наоѓаат во месноста „Плепа“.

Истиот медиум пренесе и друг видеозапис од Голем, во кој се гледаат дел од оштетените домови кои се од поновата и постарата градба. Во домот на Еќрем Абдишај, во селото Тилај на админитративната единица Голем, собата има веќе три пукнати ѕидови, а четвртиот ѕид веќе паднал.

– Тука живеам 35 години. Бев внатре во кујна и почуствував потрес, станав и се држев за вратата, потоа слушнав силен звук, фала богу сите сме живи – вели Еќрем.

– Се надевам дека државата ќе ја стави раката на срце и за нас, за да живееме како сите луѓе – вели пак Хамиде.

Земјотресот што се смета за најголем во последните 30 години во Албанија, зад себе остави повеќе од 1.900 оштетени домови.