Кино МСУ ја продолжува својата летна филмска програма. Од 26 до 28 јули љубителите на филмската уметност ќе може да уживаат во три извонредни филмски остварувања.

Се работи за три документарни филмови, кои во изминатите години беа прикажувани и наградувани на најзначајните филмски фестивали низ светот. Сите филмови ја обработуваат жешката тема – Украина.

На 26 јули се прикажува документарниот филм „Земјата е сина како портокал“ (Украина, Литванија / 2020 / 74’) на Ирина Цилик, кој ја прикажува приказната за самохраната мајка Ана и нејзините четири деца. Тие решаваат да снимат филм за војната во воената зона во Донбас во Украина.

Проекцијата на „Дождов никогаш нема да запре“ на Алина Горлова е на 27 јули. Од сириската граѓанска војна до конфликтот во Украина, постоењето на протагонистот Андриј е одредено од навидум вечниот тек на животот и смртта.

Програмата ќе биде заокружена со „Далечниoт лаеж на кучињата“ на Симон Леренг Вилмонт на 28 јули. Десетгодишниот Олег живее во селце во источниот дел на Украина, претворен во воена зона во која често одекнуваат бомби и проектили. Филмот сведочи како детската невиност исчезнува под звукот на гранатите, но и дека блиските врски, иако кревки, се клучни за да се преживее.

Проекциите се бесплатни и започнуваат од 21 часот, на отворено – на тремот во МСУ. Капацитетот е 60 седишта.