Американскиот гитарист Дики Бетс, кој беше еден од основачите на музичката група „Оман брадерс бенд“, почина на 80-годишна возраст.

„Со длабока тага и тешко срце, семејството Бетс го објавува мирното починување на Форест Ричард ‘Дики’ Бетс. Легендарниот изведувач, текстописец, лидер на бендот и семеен човек почина денеска во својот дом во Оспреј, Флорида, опкружен со неговото семејство. Дики беше поголем од животот и неговата загуба ќе се почувствува ширум светот“, се вели во соопштението на семејството.

Во изјава за „Ролинг стоун“, неговиот менаџер Дејвид Сперо сподели дека гитаристот имал рак и хронична опструктивна белодробна болест.

Родум од Вест Палм Бич, Флорида, раните музички влијанија на Бетс вклучуваат блуграс, кантри, а подоцна и рокенрол. Заслужни за помагање во дефинирањето на звукот и жанрот на јужниот рок во 60-тите и 70-тите, Бетс, басистот Бери Окли и тапанарите Буч Тракс и Џејмо им се придружија на браќата Грег и Дуан Олман за да го формираат бендот „Олман брадерс“ во 1969 година.

Бетс го напиша и отпеа најголемиот хит на групата, „Ramblin’ Man“, и првично имаше намера друг изведувач да ја пее песната.

„Имав намера да му ја испратам ‘Ramblin’ Man’ на Џони Кеш“, рече Бетс во 2020 година, додавајќи дека „мисли дека тоа е одлична песна за него“. „Но, сите ја сакаа таа песна. Дури и татко ми ја сакаше песната, пред да ја снимиме или нешто друго. Размислував да му ја испратам на Џони Кеш за да видам дали сака да ја сними“, рече тој.

Бетс ја напушти оваа група во 2000 година. Додека бендот продолжи со турнеја уште речиси 15 години и издаде уште еден студиски албум, Бетс тргна на турнеја со својот бенд „Грејт саутерн“, во кој учествуваше и неговиот син Дуан, и објави уште еден студиски албум.