Еми Кони Берет положи заклетва за судија на Врховниот суд на САД, откако Сенатот ја потврди нејзината номинација со 52 гласа „за” и 48 „против”.

Републиканската сенаторка Сузан Колинс од Мејн е единствената која се придружи на сите демократи во Сенатот, гласајќи против номинацијата на Берет. Таа изјави дека не може да го даде својот глас за Берет, имајќи предвид колку се блиску претстојните претседателски избори. Ниту еден друг судија на Врховниот суд на САД досега, во изминатите 150 години, не е потврден, а да не освоил ниту еден глас на малцинската партија.

Берет е трет судија во деветчлениот суд, која е номинирана од американскиот претседател Доналд Трамп и значително го поместува идеолошкиот баланс кон конзервативното мнозинство од шест наспроти три.

Кандидатката на Трамп, која го пополни испразнетото место поради смртта на Рут Бејдер Гинсберг, потенцијално отвора нова ера на пресуди за абортусот, Законот за попристапна здравствена заштита, познат како „Обамакер”, па дури и изборите.

– Ова е ден од огромно значење за Америка, изјави Трамп на церемонијата на полагање заклетва, на која присуствуваа околу 200 гости.

Берет изјави дека преку „ригорозниот процес на потврда” научила дека „работата на судијата е да се спротивстави на своите политички преференции”. Таа вети дека ќе работи „без страв и непристрасно”.