Пристапот до чиста вода за пиење, покривката од пепел и отсечените комуникации се најголемите проблеми со кои се соочуваат жителите на пацифичката земја Тонга по ерупцијата на подокеанскиот вулкан и цунамите што го заплиснаа брегот.

Океанот навлегол длабоко во населените крајбрежни места и предизвикал големи штети, но, освен тревогата поради една исчезната Британка, до вчера немаше информации за жртви и повредени на пацифичкиот остров. Тонга е под покривка од пепел, кој ги контаминира изворите на чиста вода, а поради оштетување на инфраструктурната мрежа целосно била прекината комуникацијата со некои островчиња од пацифичкиот архипелаг.

Аеродромот останал функционален, па Нов Зеланд и Австралија испратија на помош извидувачки авиони, за да се утврди штетата. Доставувањето хуманитарна помош за загрозените е делумно попречена поради острите мерки на Тонга за да се изолира целосно од пандемијата. На Тонга досега имало само еден единствен случај на ковид-19, регистриран лани на 30 октомври.

Цунамито предизвикано од ерупцијата предизвика жртви на далечина од илјадници километри – во Перу, каде што поради високите бранови се удавиле две лица. Како мерка на претпазливост привремено биле затворени повеќе од 20 перуански пристаништа.

Големи бранови го заплиснаа и брегот на Јапонија, имаше тревога на западниот брег на САД, како и на островската сојузна држава Хаваи, каде што океанот навлегол на копно, но не предизвикал голема штета. Цунамито го разбранувал и Јадранот, но незначително. Последиците биле регистрирани од метеоролошките станици на Истра, до која плимниот бран патувал 17.000 километри за 15 часа.