Билатерални односи меѓу Македонија и Луксембург се пријателски, а двете земји се стремат кон натамошно зајакнување на соработката… Луксембург е ценет партнер во контекст на европската и евроатлантската интеграција на земјава истакна претседателот Стево Пендаровски на денешната средба со министерот за надворешни и европски работи, Жан Аселборн кој денеска е во официјална посета на земјава.

Во соопштението од претседателскиот кабинет се додава дека Северна Македонија високо ја цени силната поддршка од Луксембург во однос на прашањето за отпочнување на пристапните преговори за членство со Европската Унија, како и за ратификацијата на пристапниот протокол за членство на државата во НАТО во јули минатата година.

Во контекст на натамошното продлабочување на билатералната соработка, на средбата беше посочена потребата за зајакнување на економската соработка и зголемување на трговската размена меѓу двете држави.

На средбата беа разменети мислења за актуелните состојби во регионот, вклучувајќи ги предизвиците поврзани со нелегалната миграција.