Партијата на Рама освои 49 отсто од гласовите според половина од пребројаните ливчиња
Владејачката Социјалистичка партија на премиерот Еди Рама освои 49 отсто од гласовите на парламентарните избори, покажуваат денеска објавените прелиминарни резултатите на основа на половина од преброените гласачки ливчиња.
Главната опозициска партија, Демократската партија на Љуљзим Баша освои 39 отсто од гласовите.
Останува непознато дали партијата на Рама ќе има 71 пратеник, односно апсолутно мнозинство во парламентот со 140 места.
Според прелиминарните резултати на вчерашните избори гласале 48 отсто од гласачите, повеќе во однос на изборите пред четири години.
Околу 3,6 милиони гласачи со право на глас во Албанија и странство гласаа за избор на 140 пратеници.
Гласањето помина релативно мирно, иако со одредени проблеми со логистика и наводи за фотографирање на гласачките ливчиња.
Илирјан Целибаш, директорот на Централната изборна комисија, ги оцени изборите како успешни и најави дека конечниот победник на изборите ќе биде познат утре вечер.
Извор: Бета.рс