Палестински милитанти истрелаа ракета кон Израел, па кажаа дека било грешка
Од Газа денеска била истрелана ракета кон јужен Израел, но палестинските милитантни групи соопштија дека лансирањето било техничка грешка и оти примирјето со кое заврши петдневниот конфликт, постигнато еден ден претходно со посредство на Египет, сѐ уште е на сила.
Набргу потоа се слушнале експлозии во северниот дел на Појасот Газа. Палестинците известија дека Израел погодил во стражарска станица на милитантите. Засега нема потврда за ова од израелската армија.
Непосредно пред зајдисонце, сирени се огласиле во израелските градови во близина на границата, по што жителите избегаа во засолништа само 20 часа по стапувањето во сила на примирјето.
Израелската војска соопшти дека една ракета истрелана од Газа погодила отворена област.
Извор од заедничката оперативна соба на милитантните групи во Газа изјави дека ракетата била лансирана поради техничка грешка. Нема извештаи за повредени. јт/Фото: МИА Архива .