На поранешниот претседател на Киргистан, Алмазбек Атамбаев, судот му одреди притвор до 26 август, откако тој вчера беше приведен во неговата резиденција од специјалните сили,  по судирите со неговите поддржувачи, јавија француските медиуми.

Оваа централно-азиска држава, која за помалку од две децениио преживеа две револуции, во моментов се наоѓа на работ на нова криза заради кавгите меѓу Атамбаев и неговиот доскорешен политички миленик кој се претвори во негов главен опонент, актуелниот претседател Сооронбај Џеенбеков.

Агенциите потсетуваат дека Атамбаев беше приведен откако вчера им се предаде на силите за безбедност.

• Експретседателот на Киргистан за денешниот инцидент: Јас пукав во припадници на специјалните сили

Во третиот напад врз неговиот дом во селото Кои-Таш, крај главниот град Бишкек, припадниците на полицијата успеаја да упаднат во резиденцијата на поранешниот претседател.

Акцијата на апсење почна во средата вечерта, со неуспешен обид на силите на редот да го приведат Атамбаев. Според последната информација, во текот на акцијата загинал еден припадник на специјалните единици, а 80 биле ранети.

Главното државно обвинителство против Атамбаев покрена обвинение за предизвикување масовни безредија и хулиганство.