Премиерката на Србија, Ана Брнабиќ најави зголемување на платите во земјата од 1 ноември од 8 до 15 отсто, а најголеми ќе бидат во здравство.

На медицинските сестри платите ќе им бидат поголеми за 15, на лекарите за 10 отсто, изјави Брнабиќ на конференција за медиумите.

Поголеми за 9 отсто ќе бидат платите во образованието, судството и обвинителството, вработените во установите за социјална заштита и припадниците на службите за безбедност, вработените во државната управа ќе добијат зголемување за 8 отсто.

„Горда сум што денес можам да кажам дека на седница на владата го усвоивме предлогот за позитивен ребаланс на буџетот и тоа ќе го проследиме вечерва на одлучување во Собранието. Ребалансот во минатото секогаш беше во негативен контекст. Ова е прв позитивен ребаланс во историјата на Србија и тоа значи дека го имаме не затоа што ги зголемивме расходите, туку затоа што ги зголемивме приходите кои се поголеми од очекуваното. Така што сакаме да им вратиме нешто на граѓаните на Србија“, рече Ана Брнабиќ.