Новогодишната прослава на Тајмс Сквер само за вакцинирани
Њујорк ќе им дозволи само на вакцинираните граѓани да се соберат на Тајмс Сквер за дочекот на Новата 2022 година, најави вчера градоначалникот Бил де Блазио, откако минатогодишниот пречек беше скромен поради пандемијата.
Стотици илјади луѓе ќе можат да присуствуваат на традиционалното спуштање на светлото топче доколку докажат дека се целосно вакцинирани против корона вирусот, изјави Де Блазио за новинарите.
Луѓето кои не можат да се вакцинираат од медицински причини ќе мора да покажат негативен ковид тест не постар од 72 часа пред настанот, објави Си-Ен-Ен.
„Сакаме да бидеме одлични, да бидеме полни со живот, сакаме тоа да биде голема прослава на Новата година“ изјави Де Блазио.
Тајмс Сквер беше речиси празен на почетокот на 2021 година, а само работниците од основните служби и поканетите гости можеа да го следат спуштањето на топката притоа почитувајќи ја физичката дистанца.