Шпанскиот тенисер Карлос Алкараз го задржа првото место на најновата АТП ранг листа, а и натаму има само 20 бодови повеќе во однос на второпласираниот, Србинот Новак Ѓоковиќ.

Алкараз моментно има 9,815 бодови, додека Ѓоковиќ 9,795. И двајцата тенисери ќе играат на последниот грен слем турнир оваа сезона, „УС Опен“ кој ќе стартува денеска со првите мечеви закажани од 17.00 часот.

Шпанецот ја брани титулата во Њујорк, додека Ѓоковиќ минатата година не учествуваше на Отвореното првенство на САД бидејќи не беше вакциниран против ковид-19.

The #USOpen begins today.

— US Open Tennis (@usopen) August 28, 2023

Поради фактот дека српскиот ас не играше лани и не брани ниту еден бод во Њујорк, а Алкараз брани 2,000 бодови за титулата, на Ѓоковиќ ќе му биде доволна една победа на „УС Опен“ за враќање на врвот на АТП. Својот прв меч Ноле ќе го има во 02.30 часот по македонско време против Александр Милер од Франција.

Самото појавување во првото коло носи 10 бодови, додека пласманот во второто коло на секој тенисер му носи 45 бодови, што во овој случај му е доволно на Ѓоковиќ.

На третото место на АТП листата е Русинот Данил Медведев со 6,260 бодови, следен од Данецот Холгер Руне (4,790), додека на петтата позиција е Каспер Руд од Норвешка (4,715).

АТП листа:

1. Карлос Алкараз (Шпанија) 9,815 бодови
2. Новак Ѓоковиќ (Србија) 9,795
3. Данил Медведев (Русија) 6,260
4. Холгер Руне (Данска) 4,790
5. Каспер Руд (Норвешка) 4,715
6. Јаник Синер (Италија) 4,645
7. Стефанос Циципас (Грција) 4,580
8. Андреј Рубљов (Русија) 4,515
9. Тејлор Фриц (САД) 3,605
10. Френсис Тиафо (САД) 3,050

Пад на Калин за 23 позиции, Ѓорческа напредуваше шест места