Фудбалерите на Јувентус продолжуваат со лошите игри сезонава и загубија од екипата која во првите шест кола во Серија А освои само еден бод.

„Старата дама“ беше надиграна и понижена од Монца која оствари историски успех, ја забележа првата победа во Серија А и многу веројатно му го потпиша отказот на Масимилијано Алегри.

Челниците на Јувентус до денеска упорно повторуваа дека Алегри ја има нивната поддршка, но италијанските медиуми веднаш по поразот на „старата дама“ почнаа да пишуваат дека најтрофејниот тим во Серија А во следното коло ќе има нов тренер.

Јувентус по седум кола има само 10 бода и се уште нема триумф на гости, а единственте победи ги оствари против Специја и Сасуоло на домашен терен.

Големи заслуги за триумфот на Монца има играчот на Јувентус, Анхел ди Марија кој во 40 минута заработи црвен картон. Голот за историска победа на Монца во Серија А го постигна Гуткјер во 74 минута.

Убедлив триумф оствари Лацио на гостувањето кај Кремонезе од 0:4. Два гола постигна Чиро Имобиле, а по еднаш во листата на стрелци се запишаа Сергеј Милинковиќ-Савиќ и Педро.
Фиорентина со головите на Иконе и Гонзалез со 2:0 ја совлада Верона.