На Институтот за македонска литература одбележани се два јубилеја на писателот Јован Павловски
Институтот за македонска литература (ИМЛ) при Универзитетот „Св. Кирил и Методиј“ – Скопје, на 12 октомври одбележа два јубилеја на македонскиот истакнат писател, поет, раскажувач, енциклопедист и публицист Јован Павловски: 85 години од неговото раѓање и 65-годишната творечка дејност.
Собирот го отвори претседателката на Организациониот одбор, проф. д-р Лорета Георгиевска – Јаковлева од ИМЛ, а за творештвото на Павловски беше прочитан реферат на акад. Катица Ќулавкова (МАНУ) на тема „Поетското творештво на Јован Павловски видено низ призма на неговите митски, историски и поетски слики“.
Со свои текстови учествуваа и проф. д-р Наташа Аврамовска за романот „Град, години, луѓе“ на Павловски во излагањето со наслов „Правта и ѕвездите“, проф. д-р Лорета Георгиевска – Јаковлева на тема „Романескниот опус на Јован Павловски“ и проф. д-р Гоце Смилевски, кој зборуваше на тема „Роман за еросот, отуѓеноста и општествената ентропија: ‚Сок од простата‘ од Јован Павловски“.
Како поет, раскажувач, романсиер, писател за возрасни, писател за деца и млади, хроничар – документарист, енциклопедист и публицист, Јован Павловски создаде богат и разновиден опус, кој има свое значајно место во летописот и во тековите на современата македонска литература.
Дебитираше со стихозбирката „Август“ во 1961 година, а потоа објави низа поетски книги, меѓу кои се: „Медеја“, „Идентитет“, „Ментален простор“, „Одработен страв“, „Строгоста на живеењето“ и други.
Автор е на романите „Тоа Радиовце во кое паѓам длабоко“, „Сок од простата“, „Проверка на слободата“, „Град, години луѓе“ и други. Павловски има објавено и повеќе документаристички дела, меѓу кои: „Блиско сонце“, „Гемиџиите“, „Ѕвездена прашина“, „Огнено семејство – Спомени на Лика Чопова“, „Ние на Татковината ѝ должиме сѐ, а таа нам ништо!“, „Судењата како последен пораз“, „Кажувања“, како и публицистичките: „Бев со нив“, „Од онаа страна на границата“, „Од првична идеја до држава“ (коавтор: Мишел Павловски) и други. Неговото творештво е преведено на повеќе од 20 јазици во светот.
(Текстот е објавен во „Културен печат“ број 150, во печатеното издание на весникот „Слободен печат“ на 15-16 октомври 2022)