Министерство за правда на САД: Обвинение против шест Руси поради сајбер напади
Министерството за правда на САД покрена обвинение против шест руски воени претставници под сомнение дека имале намера да ги загрозат изборите во Франција во 2017 година, Зимските олимписки игри и американската економија преку сајбер напади.
Сите шестмина обвинети се членови на руската воена агенција ГРУ, а според обвинението, тие се осомничени и за мешање во внатрешната политика на Украина. Според британски функционери, станува збор за агенти на Единицата 74455 во воената агенција ГРУ кои се занимавале со креирање лажни интернет сајтови и онлајн налози со цел хакирање.
– Акциите на ГРУ против Олимписките и Параолимписките игри се цинични и несовесни. Ние најостро ги осудуваме, рече британскиот министер за надворешни работи Доминик Раб.
Тој додаде дека објавувањето на обвинението против руските агенти следувало во координирана акција со меѓународните сојузници, за „да се сврти вниманието и за одбрана од руските акции во сајбер просторот”.
Според дел од западните медиуми, има сомнение дека руските агенти планирале напади на претстојните олимписки и Параолимписки игри во Токио.
Американски медиуми јавуваат дека во обвинението напишано на 50 страници се споменуваат сајбер напади на руски агенти и на Зимските олимписки игри 2018 во Јужна Кореја, кога на руските спортисти им беше забрането учество поради користење на недозволени допинг средства.
Во обвинението се вели дека руските сајбер напади имале за цел „промовирање на руски геополитички интереси”.