Македонскиот селектор Благоја Милевски смета дека натпреварите со фудбалски гиганти, како што е Белгија, се неопходен дел од патот кон напредокот на македонската фудбалска репрезентација. Утрешниот натпревар во Брисел, кој е дел од квалификациите за Светското првенство 2026, за него претставува уште една важна лекција и можност за развој.

„Немаме често можност да играме со вакви селекции, но со пласманот во Б дивизијата од Лигата на нации, тоа ќе се промени. Затоа и пријателските натпревари ги закажувавме со реномирани противници – за да се навикнеме на интензитетот и квалитетот на елитниот фудбал. Само така можеме да растеме и да бидеме конкурентни на повисоко ниво“, изјави Милевски.

Селекторот изрази задоволство од ангажманот и посветеноста на своите избраници, за кои вели дека веќе имаат искуство со големи предизвици.

„Оваа генерација веќе покажа дека може да се носи со најдобрите – имаме настап на Европско првенство и со младинската и со сениорската селекција. Секако, натпревар сам по себе не значи ништо ако не го искористиме за напредок. Белгија е фаворит, тоа е јасно, но ние и понатаму ќе го живееме нашиот сон и ќе се бориме да останеме конкурентни во овие квалификации“, истакна македонскиот селектор.

Натпреварот помеѓу Белгија и Македонија се игра утре во терминот од 20:45 часот.

Преземено од: Спорт.ком.мк