Издавачката куќа „Темплум“ во рамките на едицијата „Старо купувам“ објави мала збирка на „феминистички народни песни“ илустрирана од три сјајни уметници.

Уредник на изданието е Никола Гелевски, а во збирката се употребени илустрации од Маја Стефановска, Душица Димитровска и Будимка Поповска.

– Со збирката сакаме низ внимателни слики да претставиме дваесетина посебни, необични, интригантни „женски песни“ од народното творештво. Избирајќи три различни уметници и три различни ликовни приоди сакаме да укажеме на разноликоста на темата со која се занимаваме, создавајќи предизвикувачки споеви и контрапункти ем меѓу различни ракописи, ем меѓу два медиума – книжевноста и сликарството. Оти, како што велеше Вилијам Блејк, спротивставеноста е вистинско пријателство – истакнуваат од „Темплум“.

(Текстот е објавен во „Културен печат“ број 124, во печатеното издание на весникот „Слободен печат“ на 9-10 април 2022)