Филмските продукции „Синемон Медија Фактори“ и „Револушн“ на 13 октомври, со почеток во 21 часот, во „Киноверзум“ во Штип премиерно пред македонската публика ќе го прикажат филмот „Кино Љубов“.

Ова уметничко остварување е продуцирано од Јани Бојаџи и Дејан Милошевски, а сценарист, режисер и монтажер е Јани Бојаџи. Во главните улоги настапуваат Дејан Лилиќ, Јелена Жугиќ, Роберт Ристов, Мирјана Ристов и Благоја Чоревски, како специјална ѕвезда-гостин.

Композитор на музиката е реномираниот Горан Трајкоски, дизајнер на звукот е Игор Василев, продукциски дизајнер е Лазе Трипков, а директор на фотографијата е Иван Зороски. Камера оператор е Марко Најдановски, а костимографијата е на Александра Горчилова.

Филмот „Кино Љубов“ носи исклучително интересна приказна раскажана со голема умешност, а низ малку кадри. По проекциите во повеќе држави и учеството на бројни фестивали на 13 октомври ќе ја доживее својата македонска премиера.

– „Кино Љубов“ е вивисекција на нашиот живот денеска како уметници, но и на нас како луѓе, чии семејства под притисок на лудилото наоколу се на работ на распаѓање. Овој филм е нашиот одговор на прашањето како да се сочуваме самите себе си и нашите семејства? Љубовта е состојката за спас која ние во овој филм, кој во суштина е насилен, во краен случај ја нудиме и во неа веруваме до крај – објаснува режисерот и сценарист Јани Бојаџи.

Филмот е снимен како „инди“ – независна продукција без финансиска поддршка од Агенцијата за филм и Министерството за култура на Македонија. Сниман е за време на корона-пандемијата во Скопје, под специјални здравствени услови.

– Овој проект за време на подготовките и снимањето минуваше низ процес досега непознат за македонската кинематографија во однос на снимање и работа со актери. Приказната е раскажана во десет кадри, со што по својата форма „Кино Љубов“ е филм направен во стилот познат како „уан тејк“ – изјави продуцентот Дејан Милошевски.

За македонската премиера на филмот е одбран градот Штип, како културен и универзитетски центар во регионот, а дополнително е и град кој после долго време го добива своето редовно кино, иницијатива на дистрибутерот „Киноверзум“. Идејата на продуцентите е „Кино Љубов“ да биде можност за промоција на македонските кина и враќање на љубовта кон киното, што е основна приказна во филмот.

Скопската премиера е закажана за 26 октомври во киното „Синеплекс“, а во меѓувреме филмот ќе го види и публиката во Неготино, Велес, Свети Николе, Прилеп и други градови низ цела Македонија.

Светската премиера на „Кино Љубов“ се одржала во декември 2022-та година на Фестивалот на авторскиот филм во Белград. Досега филмот поминал на 13 фестивали на три континенти, а до крајот на годината го очекуваат и фестивали во Загреб, Рим и Измир.