Лукаревска за информациите дека АА се интересира за нејзината фотелја во УЈП: Амбициозни имало и ќе има
Потпретседателката на СДСМ и директорка на Управата за јавни приходи (УЈП), Сања Лукаревска, вечерва во гостувањето на „ТВ21“ одговори на информациите кои се појавија во јавноста – дека Алијансата за Албанците, која влегува во власта, била заинтересирана за челната функција во УЈП.
„Амбициозни имало и ќе има, меѓутоа и шпекулации имало и ќе има“, вели Лукаревска.
„Легитимно е за секоја политичка партија која влегува во коалицијата да има свои аргументи за одредено министерство, одредена институција и така натаму,“ додаде таа.
Лукаревска вели дека во преговорите со раководството на АА околу влегувањето на партијата во владата, имале „одличен преговарачки тим“, а целиот процес на преговори „се одвивал во најдобар ред“.
Околу владејачкото мнозинство во Собранието, Лукаревска рече дека не се согласува со ставовите дека тоа е „на стаклени нозе“, бидејќи е евидентно дека има окрупнување.