Кралицата Елизабета се обрати до нацијата за коронавирусот: Сигурна сум дека сме дораснати на овој предизвик
Кралицата им се заблагодари на научниците, медицинските работници и јавните служби.
Британската кралица Елизабета (93) денеска соопшти дека кралското семејство ќе даде свој придонес во борбата против ширењето на коронавирусот.
– Многумина од нас ќе мора да најдат нови начини да останат во контакт едни со други и да се осигурат дека нашите најблиски се безбедни. Сигурна сум дека сме дораснати на овој предизвик, рече кралицата во обраќање кон нацијата.
– Бидете сигурни дека моето семејство и јас сме подготвени да ја одиграме нашата улога, рече таа.
Кралицата претходно откажа неколку нејзини претходно најавени состаноци и настани и денеска од претпазливост порано се врати во замокот Виндзор со сопругот, принцот Филип (98).
Таа додаде дека кралското семејство е свесно оти многу граѓани на Велика Британија се многу загрижени.
– На сите им се советува да ги смениме нашите нормални рутини и вообичаен начин на живот за поголемо добро на заедниците во кои живееме и особено за да ги заштитиме најранливите меѓу нив, рече таа.
Кралицата им се заблагодари на научниците, медицинските работници и јавните служби.
– Но сега повеќе од кога било во нашата понова историја, сите ние имаме важна улога да играме како поединци – денес и во наредните денови, недели и месеци, рече британската кралица Елизабета.
