Министерката за култура Бисера Костадиновска-Стојчевска денеска се сретна со колешката од Албанија, Елва Маргарити, по повод првата рестритуција и враќање на незаконски изнесеното културно наследство од Македонија кое беше пронајдено во Албанија.

Како што соопштија од Министерството за култура, на средбата се зборувало за целата процедура и за успешното враќање на незаконски изнесеното културно наследство од Македонија, резултат на блиската и интензивна соработка меѓу двете држави.

–Успешната соработка е потврда за пријателството и довербата што ги негуваме како министерства за култура на Северна Македонија и на Албанија – рече Костадиновска-Стојчевска, потенцирајќи ги добрата волја и посветеноста од двете страни за заштитата и промоцијата на заедничките културни обележја.

Костадиновска-Стојчевска и Маргарити ги размениле искуствата и околу актуелните прашања и процеси во нивните ресори, а посебен акцент бил ставен на следните чекори во спроведувањето на заедничката агенда за заштита на Охридскиот Регион при спроведување на препораките од УНЕСКО.

– Ќе продолжиме со зацврстување на соработката меѓу нашите две земји во областа на културата, зачувувањето на наследството и бескомпромисната борба против нелегалното движење на нашето материјално културно богатство – посочи на средбата Маргарити.

Министерката Костадиновска-Стојчевска порачала дека во духот на добрососедските односи и на мултикултурализмот, како основа на нашите регионални политики, ќе се унапредува соработката, најавувајќи ја нејзината идеја и иницијатива за потпишување Меморандум за разменување стручен кадар, искуства и знаење меѓу уметниците и институциите помеѓу државите од Западен Балкан.