Знаеме дека долгото седење не е добро за нас, но колку вежбање е потребно за да се спротивставиме на негативните здравствени ефекти од долгото седење?

Истражувањата покажаа дека околу 30-40 минути дневно интензивно вежбање треба да биде сосема доволно, пишува „Саенс алерт“.

До 40 минути „умерена до енергична физичка активност“ секој ден е отприлика вистинската „формула“ за да се компензираат 10 часа неподвижност, иако секое вежбање или дури и самото стоење помага до одреден степен.

Анализата покажа дека ризикот од смрт кај оние со повеќе статичен начин на живот се зголемува како што се намалува времето поминато во умерено-енергична физичка активност.

Иако мета-анализите како оваа секогаш бараат сложено поврзување на податоците од различни студии со различни волонтери, временски периоди и услови, силата на оваа конкретна студија е што се потпираше на релативно објективни податоци од уреди за носење, а  не на самопријавените податоци од учесниците.

Истражувањето базирано на уреди за носење е во голема мера во согласност со упатствата на СЗО за 2020 година, кои препорачуваат 150-300 минути умерена или 75-150 минути енергична физичка активност секоја недела за да се неутрализираат штетните ефекти од седентарен начин на живот.

Качување по скали наместо со лифт, играње со деца и домашни миленици, учество во јога или танцување, домашни работи, пешачење и возење велосипед се предложени начини на кои луѓето можат да бидат поактивни, а ако не можете веднаш да одвоите 30-40 минути научниците советуваат да почнете полека.