Еквадорскиот претседателски кандидат Фернандо Вилависенсио синоќа бил убиен на предизборен митинг во Кито, додека неговиот напаѓач бил неутрализиран по размената на оган со полицијата која го обезбедувала собирот.

Канцеларијата на јавниот обвинител на Еквадор соопшти дека Вилависенсио им подлегнал на раните здобиени во нападот и дека шест лица се уапсени. Претседателот на Еквадор Гиљермо Ласо прогласи тридневна жалост.

Според анкетите на јавното мислење, Вилависенсио имал поддршка од 7,5 отсто од гласачите и бил петти најпопуларен меѓу претседателските кандидати.

Загинал кога влегувал во автомобилот со кој требало да се оддалечи од местото на митингот. Страшното видео од местото го обиколи светот. Еден член од неговиот изборен штаб за локалните медиуми изјавил дека „Вилависенсио влегувал во својот автомобил кога напаѓачот му пришол и го застрелал во главата“.

Одговорноста за убиството ја презеде криминалната група Лос Лобос (Волци), јавува Би-Би-Си. Лос Лобос е втората по големина банда во Еквадор со околу 8.000 членови, од кои многумина се зад решетки.

Лос Лобос, отцепена група од бандата Лос Конерос, се верува дека е поврзана со мексиканскиот картел Нова генерација (ЦЈНГ) Халиско, кој е познат по трговијата со кокаин.

Сомнежот за убиството најпрво паднал кај Лос Конерос, кој му се заканувал на Вилависенсио минатата недела, но Лос Лобос ја презеле одговорноста во видеото на кое се прикажани членови на бандата кои мавтале со оружје.

Еквадор историски е релативно безбедна и стабилна земја во споредба со другите во Латинска Америка, но криминалот се зголемил во последниве години, поттикнат од зголеменото присуство на колумбиски и мексикански нарко картели, кои се инфилтрирале во локални криминални банди.

Убиството се случува на помалку од две недели пред претседателските избори, каде што прашањето на несигурноста е голема загриженост.

Еквадорски политичар и пратеник во парламентот, пред неговата политичка кариера бил новинар кој известувал за корупција и насилство во земјата.

Тој бил еден од најжестоките критичари на поранешниот еквадорски претседател Рафаел Кореа и бил во егзил во Перу откако јавно ја критикувал администрацијата. Тој поминал неколку месеци во затвор додека тужбата била отфрлена во февруари 2018 година.

Роден во Алауси во 1963 година, студирал новинарство и комуникации на Кооперативниот универзитет Колумбија. Бил во брак со Вероника Сарауз, со која се запознал додека бил пратеник, со која имал пет деца.

По завршувањето на факултетот, тој бил еден од основачите на партијата Пачакутик во 1995 година, а следната година се приклучил на националната нафтена компанија „Петроеквадор“. Таму работел до 1999 година, по што со својот брат отворил пицерија.

Својата новинарска кариера ја започнал во весникот „Ел универзум“, критикувајќи различни администрации. Во 2015 година, Вилависенсио и еквадорската адвокатка, новинарка и политичарка Синтија Витери испратиле тајни документи до „Викиликс“ кои покажале дека Еквадор користел италијанска компанија за водење програма за надзор која шпионирала новинари и политички непријатели.

Вилависенсио бил парламентарен асистент на Клевер Хименез од 2013 година, за кое време тој го обвинил Кореа дека наредил вооружен напад во болница за време на полициски бунт во септември 2010 година. Кореа го тужел и бил осуден на 18 месеци затвор.

Заминал во Вашингтон за да добие помош од Меѓуамериканската комисија за човекови права, но кога се вратил во земјата веќе била распишана потерница за негово апсење. Наместо да се предаде, тој се криел во регионот на Амазон додека не му истекла казната.

Тој повторно се кандидирал за влез во собранието во 2021 година под Чесниот сојуз и го освоил пратеничкото место.

Во септември 2022 година, тој тврдел дека бил цел на обид за атентат, откако неговиот дом во Кито, наводно, бил цел на истрели.

Во мај оваа година, неговиот мандат завршил кога претседателот Ласо го распуштил собранието. Пред тоа, Вилависенсио бил критикуван од неколку членови на собранието за попречување на процесот за импичмент против Ласо.

Набргу по распуштањето на собранието, тој ја објавил својата кандидатура за претседател на Еквадор. За време на кампањата тој се фокусирал на растечката корупција, насилството во земјата и заштитата на животната средина. Тој го нарекол Еквадор „нарко држава“ поради порастот на насилството поврзано со бандите.

По неговото убиство, вдовицата на Вилависенсио, Вероника Сарауз, изјавила дека неговиот тим за обезбедување не успеал да го заштити. Андреа Гонзалес, кого го именувал за свој потпретседател во јуни, рече дека улица во неговиот роден град Алауси ќе биде именувана во негова чест.

Изборите во Еквадор се закажани за 20 август.