Книгата „Вертикали на македонската книжевност“ од Љубинка Донева содржи шеснаесет критички есеи
Шеснаесет критички есеи посветени на поетски и прозни дела од македонски автори се објавени во книгата „Вертикали на македонската книжевност“ на Љубинка Донева. Кон избраните дела Донева им пристапува со ерудиција на зналец и со префинето чувство за јазикот и книжевното ткиво на некој кој и самиот е автор. Книгата е во издание на „Восток“.
Користејќи завиден современ книжевно-теориски инструментариум и изострен херменевтички и културолошки осет, Донева ги става избраните дела и автори во контекст на современата европска и светска книжевност.
Есеите се однесуваат на дела од авторите Михаил Ренџов, Ристо Јачев, Благој Самоников, Виолета Танчева-Златева, Иван Василевски, Веле Смилевски, Ефтим Клетников, Ѓорѓи Абаџиев, Оливера Николова, Атанас Вангелов, Јагода Михајловска-Георгиева, Гоце Смилевски, Михајло Свидерски, Владимир Илиевски и Стефан Марковски.
– Во книгата присутно е едно длабоко и сеопфатно навлегување во суштината на текстови што на своевиден начин отсликуваат состојби, размисли и насоки, поврзани со современата еволуција и на поединецот и на групи и на целото национално битие и пошироко. Станува збор за уметнички текстови, кои во себе носат содржини кои се универзални и кои носат токму такви пораки, а преку овие исчитувања им е дадена вистинската вредност што ја заслужуваат – посочува магистерот по книжевност Доне Донев.
(Текстот е објавен во „Културен печат“ број 192, во печатеното издание на весникот „Слободен печат“ на 19-20.8.2023)