Нов спортски центар, паркови, санација на сообраќајници како и нова детска градинка и реконструирани улици со канализација и обновена водоводна мрежа. Општина Кисела Вода преку реализирање на овие седум проекти го прослави својот роденден.

– Седум, за седумте дена што се одвиваа под мотото „67 години моја Кисела Вода“. Во текот на претходните денови, Општина Кисела Вода го отвори паркот „Иднина“, на кружниот тек меѓу Кисела Вода и Припор. Финализираше со санација на три клучни сообраќајници во Драчево. Завршини се градежните активности за новата градинка, прва досега во Усје но и отпочна на изградба на фекална канализација во 11 Октомври бараки, како и на изградба на водоводна мрежа на улицата Илија Ристевски во Драчево – истакна градоначалникот Орце Ѓорѓиевски на отворањето на спортскиот центар во Пинтија.

Градоначалникот Ѓорѓиевски додаде дека Пинтија е една од населбите во општината која добива повеќе нови содржини за граѓаните.

– Новата фекална канализациска мрежа во должина од 1.350 метри со 29 нови шахти ќе може да одговори на густо населената населба, но и на развојната зона што се создава со изградбата на нови станбени објекти и растежот на општина Кисела Вода – соопштија од Општина Кисела Вода.

Според надлежните во населбата Драчево, во периодот што следи ќе се санирани три клучни сообраќајници Румена Хаџипанзова, Јанко Мишиќ и Речиште, а за подобрување на условите за живот на жителите од општината, пуштен во употреба беше и паркот „Иднина“.

Инаку случувањата по повод роденденот на Општина Кисела Вода, се одвиваат под слоганот „ 67 години моја Кисела Вода“, а за граѓаните беше организирана и богата културно-уметничка програма со голем број познати музички изведувачи.