Телевизиските снимки на гледачи без маски на Светското првенство во Катар ги налутија Кинезите бидејќи тие сè уште се предмет на строгите мерки на Пекинг во нивната „нула-ковид“ политика, додека остатокот од светот одлучи да живее со вирусот.

„Додека некои присуствуваат на натпреварите на Светското првенство без маска, други се затворени во своите домови еден месец без да можат да излезат надвор“, напиша жител на Гуангдонг на социјалната мрежа Веибо, кинески еквивалент на Твитер.

„Кој ми го украде животот? Нема да коментирам“, додаде тој, во услови на негодување поради безмилосниот пристап на кинескиот режим за ограничување на ширењето на вирусот.

Кина, каде коронавирусот беше откриен кон крајот на 2019 година, е последната голема економија во светот што сè уште се обидува да го запре ширењето на вирусот, затворајќи градови или цели населби и наметнувајќи пробни тестови на милиони луѓе.

Сепак, бројот на дневни случаи денеска достигна 29.157, што е ниско во споредба со другите земји, но блиску до националниот рекорд од април.