Краставиците на бугарскиот пазар веќе ја достигнаа цената на свинското месо, покажа истражувањето на „24 Часа“. Килограм краставици, без разлика дали се увезени или произведени во домашни оранжерии, на берзите се продаваат за 3 евра за килограм, а во продавниците цената им е 3,5 евра, има и случаи кога се продаваат за 4 евра.

Просечната цена на килограм свинско месо во продавниците е околу 6 евра, но едвај има викенд кога малопродажните синџири немаат промоции, каде што дури и свинските котлети често чинат меѓу 3,5 и 5 евра за килограм.

Големопродажната цена на краставиците поскапе пред две-три недели, но само последниве 7 дена е покачена со уште 27 отсто. Според првиот човек на Државната комисија за стоковни берзи и пазари, Владимир Иванов, вакви аномалии во оранжериското производство секогаш има во текот на оваа сезона, но досега не се забележани, бидејќи цените главно биле пониски.

Во февруари домашното производство е веќе завршено, а нашите јужни соседи Турција и Грција се уште ги немаат изнесено на пазарот првите количини одгледани на терен.

„Кон средината на март и уште повеќе во пресрет на Велигден, зеленчукот ќе почне да поевтинува. Но, очекувам дека и доматите ќе поскапат во наредните денови“, вели Иванов во интервју за „24 Часа“ .

Во меѓувреме, во два од трговските синџири се појавија шпански домати кои се продаваат на парче, а килограм излегува дека е 7 евра.