Кевин Спејси бил итно пренесен во болница: Му се слошило при посета на музеј во Узбекистан
Американскиот актер Кевин Спејси бил итно пренесен во болница поради страв од срцев удар, откако неговата рака почнала да трне. Непријатната ситуација се случила во Узбекистан, за време на неговото гостување на 15. издание на Меѓународниот филмски фестивал во Ташкент.
Според дополнителни извештаи, на актерот му се слошило во понеделникот, додека бил во посета на музеј. Потоа се пожалил дека „целата лева рака му се вкочанила за околу осум секунди“.
Во болница му биле направени низа тестови, бидејќи се сомневало дека може да доживее срцев удар, но лекарите му рекле дека сѐ е во ред.
„Господинот Спејси беше однесен во болница поради здравствени проблеми. Лекарите и останатиот медицински персонал го прегледале темелно и било констатирано дека нема проблеми со срцето“, рекол извор близок до актерот.
Подоцна истата вечер актерот излегол пред публиката на филмскиот фестивал и им се обратил на присутните.
„Ова ме натера да одвојам момент и да размислам колку е кревок животот – за сите нас“, рекол Спејси, а пренесе „Сан“.