Касами: Не сме му потчинети на Албин Курти
Не сме му потчинети на Албин Курти, туку соработуваме со него – вели лидерот на Движењето Беса, Билал Касами, прашан зошто како опозициска коалиција избраа политички да му се потчинат на косовскиот премиер и да прифатат негова патерналистичка улога.
Во интервју за „360 степени“ на МРТ 1, на дополнително прашање – со оглед на тоа што во последниот период Курти е силно критикуван од САД и од ЕУ, дали тоа опозицискиот „Европски сојуз за промени“ го доведува во позиција на двојство – ем да го користат политичкиот чадор од премиерот на Косово ем да се претставуваат за прозападни и проамерикански настроени, Касами одговори:
„Јас сметам дека г. Курти е најпроевропски Албанец. Г. Курти е човек на власт кој најмногу ја сака Европа… Тој е и проамерикански бидејќи моментално тој е најнекорумпиран политичар, кој најмногу верува во западните европски вредности… Во пракса г. Курти е многу поовеќе проевропски отколку г. Рама и другите албански функционери. Така што, Курти ја сака својата земја, својот народ и работи 24 часа на ден за неговата земја да биде во европското семејство“, вели Касами.
За тоа каков им е односот со дипломатскиот персонал во американската амбасада во Скопје, Касами вели дека имаат коректни релации и дека интересот на САД е и во Северна Македонија да има некорумпирана власт. Притоа, тој ја спомна неодамнешната посета што лидерите на „Европскиот сојуз за промени“ ја имаа на САД, при што остварија средби во Конгресот, Сенатот и во Стејт департментот. Прашан зошто не се сретнаа со шефовите за регионот во Стејт департментот, Габриел Ескобар и Џејмс О’Брајан, лидерот на Беса вели:
„Немавме барање да се сретнеме со Ескобар или некој друг. Нашата посета беше првично организирана за да разговараме со членови на Конгресот и Сенатот и секако дека беше потребно доколку го посетиме Вашингтон да застанеме и во Стејт департментот. Нашата цел на посета не беше Стејт департментот и разговорот со високи функционери во него, туку беа Конгресот и Сенатот и верувам дека беше успешна посета и сметам ова покажа дека САД, Вашингтон се со Албанците и Северна Македонија“.
Касами: Ако Таравари не сака да биде претседателски кандидат ќе бидам јас
