„Јас сум храбар како Марко Поло“: Градоначалникот на Венеција за одлуката да им наплати влез на туристите во градот
Градоначалникот на Венеција, Луиџи Брунијаро, ја спореди „храброста“ на неговата одлука да им наплати на посетителите пред да влезат во градот со онаа на легендарниот венецијански истражувач Марко Поло.
Венеција ќе стане првиот град во светот што ќе донесе таква мерка кога долго дебатираната наплата од пет евра ќе стапи на сила кон крајот на овој месец, објави „Гардијан“.
Брунијаро рече дека целта не е да се заработат пари за касата на Венеција, туку да се „одбрани“ градот, кој привлекува околу 40.000 посетители дневно, и да се направи попогоден за живеење.
Билетите може да се резервираат онлајн за периодот од 25 април до 14 јули, кога доаѓаат најмногу посетители во Венеција.
Венецијанските власти сметаат дека 2024 година е експериментална фаза на иницијативата.
„Ние имаме должност да ги зачуваме големите историски центри на светот“, изјави Брунијаро пред новинарите во Рим.
Тој истакна дека низ историјата никој не ризикувал да проба такво нешто и дека ниту еден политичар нема да го направи тоа што ќе го направи тој.
„Ако успее, сите ќе кажат дека е банално, а ако не успее ќе предизвика критики и лош впечаток“, посочи тој.
Посетителите, кои ќе престојуваат во Венеција на еден ден, ќе добијат кју-ар код по резервирање на билет, кој е потребен само за пристап до историскиот центар на Венеција.
Проверки ќе се вршат на различни пунктови и оние кои ја немаат шифрата ќе ризикуваат казна до 300 евра.
Жителите, луѓето кои работат во Венеција, студентите и децата под 14 години се ослободени од режимот, како и туристите кои преноќуваат.
Критичарите велат дека мерката ја ограничува слободата на движење и може да ги одврати посетителите да дојдат во Венеција.