ИЗЛОЖБА во Финска: „Личен објект“ од Јане Чаловски поставена во Хелсинки
Македонскиот ликовен уметник Јане Чаловски со самостојната изложба „Личен објект“ се претстави во Кунстхале „Кохта“ во Хелсинки, Финска.
– Поканата за изложбата се случи благодарение на кураторот Андерс Кројгер, кој ги познава мојата работа и творештво повеќе од 20 години. Дијалогот започна од моето дело „Личен објект“ посветено на мојата мајка Билјана Чаловска, а кое беше претставено на заедничката изложба со Христина Иваноска, поставена во Музејот на современата уметност во Скопје минатата година, објасни Чаловски.
Кројгер во својот текст наведува дека „Личен објект“ е изложба за личното и за предметното во која станува збор и за тоа како изложбата, како формат на експериментална артикулација, ги отелотворува трите вида слики според Делез: видливата, читливата и сликата за размислување.
Македонскиот уметник Јане Чаловски своето образование го стекнал во САД, Јапонија и Холандија, со своите дела често е присутен на меѓународните уметнички манифестации и изложбени простори, учествувал на „Манифеста 3“ (2000) во Љубљана и „Манифеста 7“ (2008) во Болцано, а заедно со Христина Иваноска беа македонски претставници на Биеналето во Венеција во 2015 година.
Самостојната изложба „Личен објект“, претставена во „Кохта“, е дел од најновата продукција на Чаловски во која се вклучени нови објекти, цртежи и материјали од неговата лична архива, како и селектирани цртежи од неговото творештво во последните 20-ина години. Изложбата „Личен објект“ во „Кохта“ беше отворена на 11 март и ќе биде поставена до 10 мај оваа година.
(Текстот е објавен во „Културен печат“ број 23, во печатеното издание на „Слободен печат“ на 21-22 март 2020)