Истражувачите потврдија: Секоја активност, па дури и спиењето е подобра за срцето отколку седењето
Истражувањата на британските научници потврдија дека секоја активност, па дури и спиењето, е подобра од седењето за здравјето на вашето срце, пишува „Еурекалерт“.
Кардиоваскуларните заболувања се една од главните причини за смрт во светот. Студијата, која е објавена во „Јуропиан харт џрнал“ (European Heart Journal) и спроведена со поддршка на Британската фондација за срце, е прва која ги следи движењата поврзани со здравјето на срцето во текот на 24 часа.
Во оваа студија, истражувачите од Универзитетскиот колеџ во Лондон анализираа податоци од шест студии, во кои беа вклучени 15.246 луѓе од пет земји, за да видат како движењето во текот на денот влијае на здравјето на срцето, според општите индикатори. Секој учесник носеше уред кој ја мереше нивната активност 24 часа и го следеше нивното здравје на срцето.
Научниците идентификуваа хиерархија на повторувачки однесувања во типичен период од 24 часа, од умерена активност која е најдобра за срцето, преку лесна активност, стоење и спиење во споредба со влијанието на седењето.
Според истражувањата, кога седењето се заменило со некоја активност, која траела дури и пет минути, тоа добро влијаело на срцето.
„Големата предност од нашето истражување е дека иако малите промени во начинот на движење може да имаат позитивен ефект врз здравјето на срцето, важно е интензитетот на движењето. Најкорисната промена што ја забележавме беше заменувањето на седењето со умерена до енергична активност – што може да биде трчање, брзо одење или качување по скали – во основа секоја активност што го зголемува пулсот и ве тера да дишете побрзо, дури и за минута или две“ , вели д-р Џо Блоџет, првиот автор на студијата и истражувач на Институтот за спорт, вежбање и срце.
Истражувачите велат дека иако секоја активност е добра за подобрување на здравјето на срцето, на лесната активност ѝ е потребно подолго време за да ја има истата корист.
Оние кои се најмалку активни најмногу имаат корист од промените во однесувањето. Научниците открија дека дури и спиењето како активност е подобра од седењето и има позитивни придобивки за срцето.